Sipai hotuin refugee-te'n Rohingya lem an chang niin a sawi

Myanmar sipai hotu, Commander-in-Chief Min Aung Hlaing chuan tunlaia Malaysia leh Indonesia-a lawng hmanga lut, Myanmar aṭanga kal, Rohingya Muslim nia inchhal tam tak chu raltlan pangngai an ni a, UN chhawmdawlna an dawn theihna atan Rohingya angin an inchhal mai tiin a sawi.

Myanmar khawthlang lamah Rohingya Muslim-te hi an khawsa a, heng mite hi Bangladesh aṭanga pem lutte nia sawi an ni. Mahse Myanmar sorkar chuan a khua leh tui anga a pawm loh avangin hamṭhatna an dawng ve thei lo a, tam tak chu dinhmun ṭha beiseiin Asia khawchhak lam ramahte an kal a ni.

Rohingya hi maktaduai 1.1 vel awmin, an zinga a tam zawk chu ram nei lo a ni a, kum 2012-a Rakhine state, Myanmar-a Buddhiste nen an intihbuaina nasa tak thlengah khan mi 140,000 chu himna zawngin an tlanchhia.

Myanmar leh Bangladesh aṭanga pem tuma kalchhuak mi tam tak chu Thailand, Malaysia leh Indonesia sorkar te'n hnarin, an chuanna lawng chu an ramah an luh an phal lo a ni. Mahse Ningani khan Malaysia Prime Miniter Najib Razak chun navy-te chu tuipuia tangkhang mekte chhanchhuak a, an rama hruai turin thu a pe a, hetihlai hian Malaysia mi tam tak chuan Rohingya-te an rama lakluh hi an duh loh thu an tarlang thung.

Malaysia leh Indonesia chuan mahni ram pemsan tuma kalchhuak, tuipuia tang mek zinga mi 7,000 te chu an rama an luh lailawk an phalsak dawn tih an sawi a, mahse a bak erawh chu an remti dawn lo. Thailand erawh chuan hei hi a zawm ve dawn rih lo tih a sawi.