Boruak bawlhhlawh vangin Pakistan-ah lockdown puang dawn

Pakistan-a Punjab province-ah boruak bawlhhlawh chuan zual lam a pan zel a, hei vang hian province khawpui, Lahore leh Multan-ah November 22-24 chhung total lockdown an puang dawn.

Punjab province hmun ṭhenkhatah chuan air quality index (AQI) hi 2000 a kai a, hei vang hian khawpui lian pahnihah hian lockdown hi puan a ni dawn ta a ni. Lockdown puan chhung hian thuneituten AQI hi an thlithlai reng a, a ziaawm mai loh chuan lockdown hi pawhsei a ni ang.

Boruak bawlhhlawh zual zel vangin Punjab province-ah mi nuai 6 velin kar liam ta chhung mai pawh khan thawk lamah harsatna an neih phah a, an zinga mi 65,000 chu damdawi-ina enkawl an ngai hial a ni. Damdawi lam thawktute pawh an indaih lo hle a, chawlh la mekte pawh koh kir an ni. Damlo an tam avangin khawpui pahnihah hian hospital-te chuan outpatient departments (OPDs) pawh zan dar 8 thleng an hawng tawh a ni.

Punjab sorkar chuan boruak bawlhhlawh a ziaawm theihna turin khuahkhirhna hrang hrang a siam tawh. Inneihna hmun leh restaurant-te khar a ni a, dawr tam tak pawh khar tir niin, zirna in hrang hrang khar a ni bawk. Private office pawh staff 50% zela inkal chhawk tura tih an ni. Pollution level tih hniamna turin ruah siam chawp, artificial rain sur tir tumin hma an la mek bawk.