Trump-a'n dan loa lutte thawnkirna turah an ram sipaite a chhawr dawn tih a sawi

US president-elect Donald Trump chuan document nei lo, dan loa US-a pem lutte thawnkirna turin border security-ah national emergency a puang dawn a, a ruala mi tam tak thawn kirnaah hian an ram sipaite a chhawr dawn tih a aswi.

President thlan dawn khan Trump hian a auhla pawimawh pakhatah dan loa pem lutte thawn kir chungchang hi a sawi a ni. President Joe Biden rorelna hnuaiah dan loin US-a lut an pung nasa hle tih sawiin, thlan tlin a nih chuan phalna nei loa lut mi maktaduai tel chu thawn kir leh, Mexico ramri pawh khuahkhirh zui a tum thu a sawi. Thlan tlin a nih hnua a thusawiah a thutiamte tihhlawhtlin a tum thu a sawi nawn leh a, hei vang hian nakkum January thlaa office a luah hunah, illegal immigrant te chungchang hi a hmalakna hmasaah a hman ngei a rinawm.

Ramria khauh zawka ven a, dan loa US-a awmte thawn kir tuma a hmalakna turah, Trump hian thawhpui, 'border czar' atan immigration chungchanga khauh tak mai, Immigration and Customs Enforcement acting chief hlui, Tom Homan a lo ruat tawh bawk. Homan hian July thlaa Republican National Convention neihnaah khan, "Joe Biden-a'n kan rama dan loa mi maktaduai tel a luh tirte hnenah khan, tunah khan in thawmhnawte lo tel ṭan tawh rawh u," tiin dan loa pem lutte chu a lo vaukhan tawh a ni.

US-ah hian document nei lo, dan loa pem lut hi mi maktaduai 11 vel an awm mek nia sawi a ni. Trump an thawnkir hna a kalpui tur hian chhungkaw mtd 20 vel a nghawng dawn nia sawi a ni bawk.