Israel-in Hamas mi hrente chhuah thei tan lawmman siam

Israel prime minister Benjamin Netanyahu chuan Hamas firfiakten October 7, 2023-a Israel an beih ṭuma an mi man, tun thlenga Gaza-a an la hrente chhanchhuah an nih theihna turin Israel chuan lawmman a siam tih Thawhlehni khan a puang.

Israel chuan Hamas mi hren mekte chhuah thei hnenah, mi pakhatah lawmman, USD mtd 5 zel a pe dawn tih a sawi. "Heng mi hren chhuahtute chu anmahni leh an chhungte pawh him takin Gaza an chhuahsan dan ngaihtuah sak an ni ang," tiin a sawi zui bawk.

PM Netanyahu hian Gaza Strip-a Israel sipaite supply route, Netzarim Corridor a tlawh ṭumin he thu hi a sawi a ni. He hunah hian defence minister Israel Katz chuan a ṭawiawm a ni. Hamas nena an indo meknaah, Israel-in a thil tum pakhat chu Hamas-ten Gaza-a ro an rel tawh lo a ni tih a sawi. Hamas mi hrente awmna zawn hriatchhuah a, hruai haw ngei tumin an bei zel a, "Kan bansan dawn lo. An dam emaw, an thi emaw, kan hmuh kim vek hma chu kan zawng zel dawn," tiin PM chuan a sawi. "An mi hrente ti natu chuan a lu chungah thisen a chhek khawl tihna a ni ang. Kan um zui zel dawn cheu a, kan man ngei ang che u," a ti.

October 7, 2023-a Hamas ten Israel an beih ṭum khan mi sang chuang an kahhlum bakah, mi 251 manin Gaza-ah an hreng a ni. An zinga ṭhenkhat chu chhuah ni tawhin, mi 37 an thi tih hriatchian ani tawh a, tunah hian mi 97 vel an la hreng mek nia hriat a ni. Hamas hian kum 2014 leh 2015-a Gaza Strip-a Israel civil mi an man pahnihte pawh a la hreng a, hei bakah hian kum 2014-a an kah hlum, Israel sipai pahnih ruang pawh an la kawl bawk.