Trump-a'n education secretary atan WWE co-founder a thlang

US president-elect, Donald Trump chuan office a luah huna a thawhpui turte a ruat chho zel. Eduation secretary atan World Wrestling Entertainment (WWE) co-founder Linda McMahon a thlang

Linda McMahon hi Trump thawhpui ṭha tak niin, a president term khatnaah pawh khan Small Bunisenss Administration enkawltu atan dah niin, kumin inthlan dawna campaign-na atan pawh sum tam tham tak a thawh a ni.

Trump chuan Truth Social-ah McMahon a thlan thu hi puangin, kum rei tak tawnhriat ṭha tak a lo neih tawh leh, Education leh Business chungchang a hriatchianna chu American zirlai leh thawktuten an chhawrin an hlawkpui dawn a ni, a ti.

Celebrity doctor leh TV host hlui, Mehmet Oz chu Centers for Medicare and Medicaid Services hotu atan Trump chuan a thlang bawk. America ram hrisel ṭha siam leh tur chuan Dr Oz tluka qualify leh thei tur hi an awm dawn lo a ni, tiin Trump chuan a sawi. Centers for Medicare and Medicaid Services hi US-a healthcare programme lian ber niin, mi mtd 150 chuang a huam a ni.

Congressional Budget Office-in a tarlan danin, kum 2023 ah US sorkar chuan Medicaid leh Medicare atan USD trillioin 1.4 chuang a seng.

Commerce secretary atan investment bank Cantor Fitzgerald hotu, billionaire Howad Lutnick a thlang bawk. Lutnick hi Trump transition team-a co-chair a ni bawk.

Trump-a'n a thawhpui tura a thlan chhuah hrang hrangte hi Senate in a pawmpui ve leh phawt a ngai dawn a ni.