IS kut aṭangin Ramadi kan la let thuai ang: PM Abadi

Iraq Prime Minister Haider al-Abadi chuan Anbar province khawpui, Ramadi chu Islamic State (IS) firfiakte kut aṭangin an la let thuai dawn tih a sawi.

IS firfiakte hian kar hmasa khan Ramadi khawpui hi Iraq security force-te kut aṭangin an laksak a, mahse Iraq sorkar chuan Ramadi khawpui la let tur hian Shia sipaite a tir a, an nawr let mek a ni. Shia sipaite hian Ramadi khua lak let tuma an beihnaah hma an sawn zel tih sawiin, khawpui khawchhak lama Husayba bial chu kar kalta Inrinni khan an la let tawh.

Ramadi khawpui la let tur hian Iraq sorkar chuan Shia sipaite a tirh bakah, anmahni pui tura in volunteer thei a zawng bawk.

PM Abadi chuan Ramadi khawpui hi an la let leh ngei dawn tih a sawi a, hemi rual hian ṭangrual pawlte puihna an mamawh tih a sawi bawk.

Kum kalta chhung khan Iraq sipaite hi IS lakah an tlawm fo a, an kut aṭangin khaw pawimawh eng maw zat an laksak tawh a, kar hmasaa Ramadi khuaa an inbeihnaah pawh khan firfiakte lam hi tlem zawk mah se, sipaite hi an tlanchhia a ni.

US Defence Secretary Ash­ton Carter chuan Ramadi khuaa inbeihna aṭang hian Iraq sipaite chuan firfiakte beihletna tur hian huaisenna an nei tawk lo niin a sawi. Sipaite hian firfiakte hi tam hneh hle mah se, beih let hram aiin inhnuhdawh a, tlanchhiat mai an thlang zawk a ni, a ti. Iraq sipaite an tlanchhiat hian US siam ralthuam an kawl eng emaw zat an tlanchhiatsan ṭhin a, hengte hi firfiakte kutah a lut ṭhin a ni.

Lebanon-a Shia Hezbollah move­ment hruaitu, Hassan Nas­ral­lah chuan khawvel pum tan IS leh Syria rama Sunni firfiak pawl dangte chu an hlauhawm a ni, a ti.

IS hian Ramadi khawpui bakah, Syria rama hmanlai khaw­­pui pawimawh, Palmyra pawh an la tawh a, Syria ram zah­ve bakah, Iraq ram hmun thuma ṭhena hmun khat an thu­nun tawh a ni.

Ramadi khawpuia firfiakte leh Iraq sipaite an inbeih hnu hian khawpuia cheng mi tam tak chu hmun him lam panin an tlanchhe tawh a, PM Abadi chuan tlanchhiate chhawmdawlna pek chu thil hautak tak a ni tih a sawi.