Thla riat tang turin Israel PM hlui hrem
Israel Prime Minister hlui Ehud Olmert chu America sumdawng mi pakhat hnen aṭanga thamna laa puh a nihna thubuaiah, Jerusalem District Court chuan thiam loh a chantir hnuah thla 8 tang turin a hrem a, dollar 25,700 chawi tura tih a ni bawk.
Police-te chuan Olmert hian Jerusalem mayor leh, Prime Minister Ariel Sharon-a hnuaia minister a nih lai, kum 1993-2006 chhung khan thamna sum a la niin an sawi. Kum 2006-a Sharon-a'n stroke a neih vanga hna a thawh chhunzawm theih loh hnu khan Ehud Olmert hian PM hna a hi a chelh a, 2009 thleng he hna hi a thawk a ni.
Kum 2014, May thla khan Jerusalem housing project thawhna tura thamna laa puh a nih avangin Olmert hi kum ruk tang tura hrem a lo ni tawh bawk. Mahse he hremna hi Supreme Court-ah a appeal mek a, nimina thiam loh chantir a nihna pawh hi court sang zawka appeal an tum thu a ukilte chuan an sawi.
Olmert chuan an puhnate chu thu dik lo a nih thu leh, thiam lohna engmah a neih loh thu a sawi.
Ehud Olmert
1973 Nationalist Likud party aiawhin a vawikhatna atan Parliament member-ah thlan a ni
1988 Prime Minister Yitzhak Shamir-a cabinet a zawm
1993 Jerusalem mayor atan thlan a ni a, hun rei tak mayor hna lo chelh tawh Teddy Kollek a hneh
1996 Jerusalem-a archaeological tunnel siam hna a enpui a, he thil vang hian Palestinian-te nena intihbuaina nasa tak a chhuah phah
2003 Prime Minister Ariel Sharon-a hnuaiah vice premier atan dah a ni
2005 Likud Party aṭanga chhuakin Sharon nen Kadima Party an din
2006 Stroke vanga Sharon a nat hnuin acting prime minister hna a thawk
March 2006 Parliament inthlanah Kadima Party a chakpui
March 2009 Benjamin Netanyahu-a'n Prime Minister atan a thlak
2012 Eiruk thubuai siamsakah a fihlim
May 2014 Housing project chungchanga thamna laa puhna thubuaiah thiam loh chantir a ni, kum ruk tang tura hrem a ni
Sept 2014 A thubuai a appeal-na ngaihtuah fel a nih hma chuan Supreme Court-in jail-a luh rih loh a phalsak
March 2015 American sumdawng hnen aṭanga thamna laa puhnaah court-in thiam loh a chantir
May 2015 Israel court-in thla riat tang turin a hrem