Venezuela eptu hruaituin chaw ngheia nawrh a tum

Venezuela eptu hruaitu, thla 15 liamtaa man Leopoldo Lopez chuan an rama politics kaihhnawih vanga mante chhuah zalen phutin chaw ngheia nawrh a tum.

A tanna aṭanga video a tihchhuahah, Lopez chuan Venezuela sorkar chu Parliament inthlan hun tur siam fel thuai turin a phut a, hei bakah hian Inrinnia remna leh muanna phuta kawngzawh neih tur chu zawm vek turin an ram mipuite a ngen bawk.

Lopez hi nikuma eptute'n sorkar laka lungawi lohna lantira nawrh an huaihawt ṭuma buaina chhuakah mawhphurtua puhin man a ni. Venezuela President Nicolas Maduro kaihhruai sorkar laka lungawi lohna lantir hian hun eng emaw chen nawrh huaihawt a ni tawh a, buaina chhuak vangin mi 40 chuang an thi tawh bawk.

Lopez chuan jail-a a tanpui, politician Daniel Cabellos pawhin chaw ngheiin nawrh a huaihawt mek tih a sawi. Lopez hi Venezuela khawpui, Caracas bula Ramo Verde jail-ah a tang mek a, video a tihchhuah hi a tanna cell-a record a ni. Video tihchhuah anih hnu lawk hian Cabellos chu Ramo Verde jail aṭang hian Venezuela kahwpuiah sawn nghal a ni bawk.