Nepal tanpuina a lut tha lo!

Lirnghing na tak tuartu, Nepal rama chhiatna rapthlak tak thleng tuartute chhawmdawlna leh ṭanpui hna thawhnaah khawvel ram dangte hmalakna chu a ṭha tawk lo hle niin United Nations official chuan a sawi.

UN chuan Nepal ram ṭanpuitu, donors tam takte chuan mipuite mamawh hmasa, ei tur leh an awm lailawkna tur lam aiin lirnghingin in a tihchhiatte sak ṭhat lam an dah pawimawh zawk a ni, a ti.

April 25 khan magnitude 7.8 leh, May 12 khan magnitude 7.3-a nain Nepal-ah hian lir a nghing a, lirnghing vanga chhiatna thlengah hian mi 8,600 chuang an thi a, midang tam takin hliam an tuar bawk. Tun thlengin chenna tur mumal nei loin mi sing tel an la awm.

UN chuan lirnghing tuar­tu, mi maktaduai hnih vel chu chhawm­dawl ngaiin an awm mek tih a sawi a, heng mite chhawmdawlna tur - puan in, ei tur, tui thianghlim leh toilet pekna turin thla thum chhung atan dollar maktaduai 423 mamawh a ni tih a sawi. Mahse sum mamawh aṭang hian Thawhṭanni thleng khan dollar maktaduai 92.4 chauh hmuh a la ni. Hei hi sum mamawh aṭanga 22% vel chauh a ni.

UN resident coordinator in Nepal, James McGoldrick chuan Nepal ram ṭanpuina a luh ṭhat loh chhan hi Syria leh Yemen-a tualchhung buaina thleng vang te, ram hrang hranga buaina thleng a awm reng vang nia a ngaih thu a sawi. Hetihlai hian ruah a sur ṭan tawh avangin lirnghingin a sâwi chet tawh hmunahte leimin nasa tak a thleng a, hei hian kawngpuite hnawhin chhawmdawlna thawn darhna kawngah harsatna lian zawk a la siam thei dawn a ni, a ti.

Lirnghing na takin a sâwi avang chhiatna rapthlak tak a thlen aṭanga a thla khatna, Thawhṭan­ni khan Kathmandu khawpuiah mi tam tak pungkhawmin, hriat­rengna hun hman a ni. Lir­nghingin kum zabi 19 hunlaia sak, Kathmandu-a tower a sawichhiat awmna hmunah mipuite hi kal khawmin lir a nghing ṭan hun, dar 11.56 khan second 56 chhung ngawi rengin an ding