China-a nursing home kangah mi 38 thi
China rama tar enkawlna inah kangmei a chhuak a, mi 38 an thi a, midang parukin hliam an tuar.
Thawhṭanni zan khan Henan province, Lushan county-a Sanlihe khuaa mimal siam, tar enkawlna in hi a kang a, a kan chhan hi hriatchian a ni lo a, chhui chian mek a ni.
Kangmei chhuahna inah hian tar 51 enkawl an ni a, an zinga ṭhenkhat chu tunge an ni tih pawh hriat theih loh khawpin an taksa a kang nasa a ni. Hliam tuar zinga pahnihte chu an ngaihtuahawm hle. China President Xi Jinping chuan hliam tuarte leh thi chhungte chu ṭanpui turin thuneitute a hrilh a, hei bakah han kangmei chhuah dan leh, a mawhphurtu pawh zawng chhuak ngei turin a ti bawk.
China ramah hian in saknaah safety rules-te zawm ṭhat tawk loh avangin chhiatna a thleng fo a, hei bakah hian hnathawktute chu chhiatna thleng thei laka inven nan training pek ṭhat an ni lo a, hmanrua pawh an nei ṭha lo hle nia sawi a ni.
February thla khan Guangdong province warehouse-a kangmei chhuak vangin mi 17 an thi a, kum 2013 June thla khan Jilin province-a ar talhna ina kangmei chhuak vangin mi 120 an thi bawk.