Australia-in Vietnam indonaa an sipai thite ruang an la dawn

Australia sorkar chuan kum 50 liamta, Vietnam War laia Australia sipai 25 thi te ruhro chu an ramah lak a tum thu a puang.

Australia Prime Minister Tony Abbott chuan Parliament-ah he thu hi sawiin, indonaa thi an sipaite hi Malaysia leh Singapore-ah phum an ni a, an chhungte'n an thlân hi khawih danglam an duh loh chuan an ruhrote lak a ni dawn lo tih a sawi.

Kum 1962-1973 inkara Vietnam buaina a thlen lai khan Australia hian sipai 60,000 chuang a thawn lut hman a, an zinga 521 hi indona hmunah an thi a ni.

PM Tony Abbott chuan an rama dual citizenship nei, firfiaka chetnaa inhnamhnawiha hriatte chu Australia khua leh tui an nihna hlihsak an ni dawn tih a sawi. He thu hi Sydney khuaa fa pahnih nei, nu pakhatin Syria-a Islamic State (IS) firfiak pawl zawm tuma a fate tlanbo sana Syria a pan hnuah a puang a ni. IS hi Australia mi 100 chuangin an zawm tawh a, an zinga 30 chu thah an ni tawh bawk.