Bangladesh-in Ansarullah Bangla Team dan pawnah hnawl

Bangladesh sor­kar chuan Islamist pawl, Ansa­rullah Bangla Team (ABT) chu dan pawnah a hnawl. He pawl hi tun hnaia blogger pathum thahnaa inhnamhnawiha puh an ni.

Sorkar chuan thu­chhuah siamin, Ansarullah Bangla Team hi sorkar dodal zawng­a a chetna avangin Anti-Terrorism Act, 2013 hnuaiah dan pawna hnawl a nih thu a sawi.

Tun hnaiah hian Bangladesh-ah hian Islamist firfiak nia hriatte'n Dhaka-ah blogger pahnih leh, Syhlet-ah blogger pakhat an that a ni. Heng blogger-te hi Islam sawiselna lam hawi an ziah vanga thah nia ngaih an ni a, activist-te chuan Bangladesh sorkar chu a mite venghim zo loah puhin, blogger-te thah an nih avanga an lung­awi lohnate pawh an lo lantir tawh a ni.

Ansarullah hi Bangladesh sorkarin dan pawna a hnawl pawl parukna a ni. He pawl hi kum 2007-a din niin, Bangaldesh-a Islam dan, Sharia law hman anih theihna atana beitu a ni. Al-Qaida nen pawh an inzawm nia sawi a ni bawk. Kum 2013 khan an pawl hotu lu ber, Mufti Jasim Uddin Rahmani chu manin jail-ah a tantir mek a ni a, tualthah thubuai siamsak a ni.

ABT hian blogger-te chauh ni lo, an pawl ngaihdan dodal chu an bei let fo nia sawi a ni a, active member 100 vel a nei mek a, pawn lam aṭanga thlawptu ṭhahnem tham tak a neih rin a ni bawk.