IS beihletnaah USA-in Iraq puih zel a tiam
US Vice President Joe Biden chuan Iraq Prime Minister Haidar al-Abadi hnenah Iraq sipaite'n Islamic State (IS) firfiak an beihletnaah US chuan theihtawpin a thlawp zel dawn tih a hrilh.
US Defence Secretary Ash Carter chuan Iraq sipaite'n anmahni aia tlem, IS firfiakte lak aṭanga Ramadi khawpui an venhim zawh loh chungchang a sawiah, Iraq sipaite chu hmelmate beih let hram tumna nei lo tiin a sawi a, hei hi Iraq sorkar lam chuan na takin an sawisel a ni. Iraq PM Abadi pawhin US Defence Secretary thusawi dan chu mak a tih thu leh, thu dik tawk lo hrilh a nih vang nia a rin thu a sawi. Abadi chuan firfiakte'n Ramadi khua an lak chuan a rilru ti na hle mah se, khawpui hi an la let leh thuai dawn tih a sawi.
Hemi hnu hian Vice President Biden chuan Carter thusawi vanga boruak ṭha lo awm hi siamṭhat tumin a rawn ṭawngchhuak ve nghal a ni. White House thuchhuah chuan, "Vice President hian thla sawmpariat kalta chhunga Ramadi khawpui leh Iraq ram hmun dangte venghim tura Iraq sipaite inpekna leh an huaisennate chu a hriatpui a ni," a ti. US chuan Iraq sipaite leh, Anbar-a sipaite thlawptu tribal pawlte chu a thlawp chhunzawm zel dawn a, IS-te'n an ram an laksakte lakir leh tura an beihnaah an theih angin an pui zawk dawn a ni tiin Biden chuan a sawi.
US hian Iraq-ah sipai 3,040 a dah mek a, hengte hian Iraq sipaite chu training leh mission dangah an pui a, khawmuala inbeihnaah erawh a la inrawlh lo. Training pek hna hi sipai 2,240 te'n an thawk a, a dang 800 vel chuan an hmun pawimawhte an veng thung.
Nimin khan Iraq state TV chuan Ramadi khawpui la let tura beihpui thlak a nih tur thu a puang a, he hunah hian Iraq security force-te chu Shiite leh Sunni paramilitary force-te'n an pui dawn a ni.