Gaza-a inkahhai puan phutna UNSC resolution US-in a dang

United Nations Security Council (UNSC)-a Gaza Strip-a inkahhai puan phutna draft resolution siam chu US chuan a veto power hmangin a lo dang leh. Hei hi Gaza Strip-a indona thleng mek chungchangah a ṭhianṭha, Israel humna tura veto power a hman vawi lina a ni ta.

UNSC council member 15 zinga 15 chuan draft resolution hi an thlawp a ni. Resolution-ah hian Gaza-a indona thleng mek chu titawp nghal tura an phut thu sawiin, mi hren mekte pawh chu chhuah tura an duh thu an tarlang.

UN-a Deputy US ambassador, Robert Wood chuan an resolution-ah hian inkahhai puan leh mi hrente chhuah an nih dan tur sawi zawmna a awm lo tiin, US chuan Hamas mi hren mekte chhuah tel nghal tura phutna tel chauh a thlawp dawn tih a sawi. Tuna rawtna siam anga kalpui a nih chuan Hamas chu an hlauhawm dawn a ni, a ti.

UNSC-ah hian member nghet, permanent member panga - China, France, Russia, United Kingdom leh United States an awm a, non-permanent member ram 10 dang chu kum hnih danah thlan an ni ṭhin. Permanent member pangate hian vote power an nei ṭheuh a ni. Tuna elected member ni mekte hi Algeria, Ecuador, Guyana, Japan, Malta, Mozambique, South Korea, Sierra Leone, Slovenia leh Switzerland an ni.

US-in a vote a hman hnuah, China chuan Palestinian mipuite nunna chu engmah loah an ngai em ni tiin a zawt. France pawhin international humanitarian law chu nasa taka palzut a ni a, hma lakna tur awmchhun chu rang taka inkahhai tluantling puan a ni, a ti bawk. UK chuan indona tih tawp a, Gaza mipuite tawrhna tihreh sak a, mi hren mekte pawh him taka chhuah vek an duh thu a sawi bawk.

Council pawn lam aṭangin US hian beih a tawk zui nasa hle bawk.Human Rights Watch's (HRW) UN director, Louis Charbonneau chaun US chuan a veto power chu Gaza-a Palestinian mite laka pawikhawihna chhunzawm zel thei tura Israel thuam chakna atan a hmang a ni, a ti.

Hetih lai hian UN-a Israel ambassador DAnny Danon chuan resolution hi remna leh muanna siamna tur lam hawi ni loin, Hamas ho thil phut ang tarlanna resolution zawk a nih th a hmain a lo sawi tawh a ni. "Mi hren mekte tana ding leh hawisantute chu hriatreng an ni ang," tiin a sawi.