Pakistan PM hlui Imran Khan bail dilna phalsak

Pakistan prime minister Imran Khan chu PM a nih laia mipui sum tichingpena puhna thubuai a neih mekah bail a dilna chu Islamabad High Court chuan a phalsak. Mahse thubuai dang eng emaw zat a la neih avangin jail aṭangin chhuah a la ni dawn lo.

Imran Khan leh a nupui, Bushra Bibi te chu thuneihna a chan laia thilpek an dawnte kawl zui leh, a ṭhen chu mimala an hlawkpuina tura hralhah puhin thubuai siamsak an ni a, an thubuai hi Toskhakhan case tia sawi a ni. Pakistan sorkar danah PM nih laia ramchhung leh ram dang aṭanga thilpek an dawnte hi an mimal tana kawl zui phalsak an ni lo.

Khan leh a nupui hian kum 2018-22 chhung khan thilpek an dawn, sorkar kuta lut tur chu dik lo taka kawl zuiin a ṭhen an hralh a, an hralhna man pawh hi rupees mtd 140 chuang a tling a ni. He thubuaiah hian thiam loh chantir niin kum 14 tang tura hrem an ni. Mahse an nupain High Court-ah hian an appeal a ni.

Kum 71 mi, Khan hi kum 2022-ah Parliament-a no-confidence vote hmanga Prime Minister a nihna aṭanga paihthlak a nih hnuah thubuai tam tak siamsak a ni tawh a, thubuai hi 150 chuang zet neiin, ṭhenkhatah chuan thiam loh chantirin hremna tur pawh puan a ni tawh a ni. Hremna pek zingah hian kum thum, kum 10, kum 14 leh kum sarih lung-in tang tura tihna pawh a tel. Mahse thiam loh chantir a nih tawhna hi sut an ni leh a, heti chung hian thubuai hmachhawn tur eng emaw zat a la neih avangin chhuah zalen theih a la ni chuang lo. Kum 2023, August aṭang khan Rawalpindi tan-in a la tang chhunzawm zel a ni.

An puhna hrang hrangte hi Khan chuan a pha thung a, politics khel chhunzawm thei lo tura a khingpuiten an beihna niin a puh a ni. A lawyer, Salman Safdar pawhin Khan chu a la zalen thuai dawn niin a sawi ve bawk.