AstraZeneca-in Covid-19 vaccine a siam Clinical trial neih mek a titawp lailawk

British-Swedish multinational pharmaceutical and biopharmaceutical company, AstraZeneca chuan Covid-19 vaccine a siam, clinical trial phase 3-a neih mek chu volunteer zingah natna nei an awm avangin nimin khan a titawp lilawk.

AstraZeneca leh University of Oxford ṭangkhawp chuan Covid-19 hri kai tihdam a nih theih nan vaccine an siam a, he an vaccine siam hi hmun hrang hrangah clinical trail neih mek a ni. 

Enchhinna an neih hi a thawh thumna an kai tawh a, mahse volunteer-te zingah a chhan hriat loha natna nei an awm tak avangin nimin khan trial neih mek chu tihtawp lailawk a ni ta a ni. An damdawi siam hi a him tawk em tih enletna an nei ṭha leh dawn a ni tiin AstraZeneca company thupuangtu chuan a sawi. 

Trial lian tham neih ṭhinah chuan damlohna thil a awm palh theih thu AstraZeneca chuan a tarlang a, hemi kawngah hian uluk leh fimkhur taka enletna neih an tum tih a tarlang bawk.

 Georgetown University-a Center for Global Health Science and Security-a research professor, Julie Fischer chuan damdawi siam chhuah tumna kawnga tihtawp lailawk awm ṭhin chu dan pangngai anga a awm ṭhin thu a sawi. "Tihtawp lailawk hun a thlen tawh chuan a hma ai nasa zawka kan fimkhur a ngai tihna a ni a, chuvang chuan hemi hun chhung hi damdawi siam chhuah tum kha a him tawk em tih uluk taka enletna hun a ni," tiin Julie Fischer chuan a sawi.    

AstraZeneca leh Oxford University ṭangkawp chuan Covid-19 vaccine siam chhuah a nih theih nan ram hrang hrang an lo thawhpui tawh bawk a, clinical trial hmun hrang hrangah neih ni tawhin, nakkum lamah chuan vaccine hi mipui hman theiha peih fel an tum thu a hmain an lo tarlang tawh a ni.