ICC-in Netanayahu leh Gallant manna tur ti chhuak; Israel-in ICC thupek tih chhuah hnawl
The Hague-a International Criminal Court (ICC) chuan Ningani, November 21, 2024 khan Israel prime minister Benjamin Netanyahu leh defence minister hlui Yoav Gallant-te lakah arrest warrant a ti chhuak. Anni bakah Hamas pawl hotu, Mohammed Deif lakah pawh arrest warrant hi tih chhuah a ni bawk.
ICC chuan Israel ram hruaitu pahnihte hi October 8, 2023 leh May 20, 2024 inkara mihringte laka pawikhawihna nasa tak thlena, war crime thlenah puhin manna tur thupek hi tih chhuah a ni tih a sawi. An pahnih hian Gaza Strip-a chengte civil miten in, ei leh in, tui, damdawi lam leh fuel leh electricity lamah harsatna an tawk dawn tih hre reng in, tum reng vanga cheah a puh. Hamas hruaitu Daif manna tur thupek pawh tih chhuah a nih thu a tarlang bawk a ni.
Court chuan arrest warrant hi 'secret' ah dah a ni tiin, hei hi a chhui hna thawktute leh, witness-te venhimna tur a ni, a ti.
ICC prosecutor Karim Khan chuan hun eng emaw chen liam taah khan October 7, 2023-a Hamas-ten Israel an beih ṭum leh, a hnuah Israel sipaiten Gaza-a beihpui an thlak chhunzawmnaah war law kalha pawikhawihna thleng tam tak a awm tiin, he thila mawhphurtute manna tur thupek ti chhuak tur hian a lo nawr tawh a ni.
ICC warrant-in kan hmalakna a ti tawp dawn lo - Netanyahu
Israel prime minister Benjamin Netanyahu chuan ICC-in Gaza-a Israel chet dan chungchanga amah leh a minister hlui, Yoav Gallant lakah arrest warrant a tih chhuah chu a dem thu sawiin, Israel chuan a pawm lo tih a sawi. He thil avang hian Israel-in a ram himna tura Gaza-a hma a lakna chu a tih tawp phah dawn lo tih a sawi bawk.
Prime Minister Netanyahu chuan, " Israel dodaltute thiltih hian min dang dawn lo a, kawng hrang hranga kan ram himna tura kan hmalakna a ti tawp dawn lo. Midangte nawrna lakah hian kan kun mai dawn lo," a ti.
Netanyahu chuan ICC chu mihring dikna chanvo humhalh tura din a ni a, mahse hemi kawnga thawktute hmelmaah a chang tawh a ni tiin, an thutlukna siam chu ram hrang hrang tana chanchin lawmawm lo tak a ni, a ti. Court-in an puhna hrang hrangte chu thu belhchian dawl lo a nih thu a sawi.
Hamas lam pawhin ICC-in an pawl hotu an puhna chu thu dik lo niin an sawi ve bawk. Hetih lai hian Deif hi kumin July thlaa Israel in Gaza-a beihpui a thlaknaah khan a thi tawh nia sawi a ni a, Hamas lam erawh chuan an la nem nghet lo a ni.
US-in ICC thutlukna a sawisel
US president Joe Biden chuan ICC-in Israel official-te lakah thutlukna a siam dan chu thil awm lo tak a nih thu a sawi.
President Biden chuan Israel himna tiderthawng zawnga beih leh vauna awm lakah, US chuan Israel chu a dinpui zel dawn a ni, a ti.
White House chuan ICC-in Israel official-te laka arrest warrant a tih chhuah chu a hnawl thu thuchhuah hran siamin a ti chhuak bawk a, mahse Hamas hotu Deif chungchang erawh a sawilang lo. National Security Council thupuangtu chuan a thuneihna huam chinah a cheah nia ICC an ngaih danah an la ding nghet tih a sawi.
President elect, Donald Trump-a'n national security adviser atana a ruat, Mike Waltz chuan nakkum January thlaah chuan ICC leh UN-in thlei bik nei taka thil an tih dan chu chhan let ngei an tum tih a sawi. "ICC hian hetianga ti tur hian thuneihna a nei lo a, an puhnate hi US sorkar chuan a pawm lo a ni," a ti.