US Senate-in Israel hnena ralthuam hralh tih tawp rawtna hnawl

US Senate chuan Democrats member ṭhenkhatin Israel hnena indonaa hman tur ralthuam hralh tih tawp a nih theihna atana bill an put luh chu a hnawl.

US senator Bernie Sanders leh Democrats member ṭhenkhat chuan Nilaini khan Senate-ah Israel hnena tank, motor round leh smart-bomb kit hralh tih tawpna tur bill an pu lut a, mahse vote laknaah member tam zawkin an hnawl nghal. Rawtna dang pahnih put luh an la tum pawh hnawl an nih ngei a rinawm bawk.

Sanders chuan Israel prime minister Benjamin Netanyahu kaihhruai sorkar chuan Hamas ringawt a do lo a, Palestinian mi zawng zawng a do a ni, tiin ralthuam lei tir hi tih tawp a ṭul thu a sawi. Sanders hi Democrats senator dang - Jeff Merkley leh Peter Welch ten an lo thlawp a ni.

Senate majority leader, Republican Chuck Schumer chuan an rawtna chu na takin a dodal tih a sawi a, "Israel hian vawiinah chauh ni loin naktuk, nakkum leh a kum dang lehzelah pawh a ram a venhim a ngai. American policy nghet tak chu Israel-in a hmelmate laka a invenhimna tura a mamawhte lo pek a ni. He policy hi kan kalsan tur a ni lo," a ti.

Republican lam chuan Israel hi an thlawp a, nakkuma President-elect Trump-a'n office thar a luah hunah, US Congress chamber pahnih an thunun dawn bawk a ni. Trump pawhin Israel a thlawp thu hi sawiin, Israel PM Netanyahu chu Gaza-a indona ti tawp thuai turin a lo ngen tawh a, hemi atana ruahmanna a neihte pawh a hrilh a ni.