Covid-19 dona kawngah China a thawk ṭha ber : Xi Jinping

China president Xi Jinping chuan Thawhlehni khan Covid-19 dona kawngah an ram chu thawk ṭha ber ram a nih thu a sawi.

Hri leng dona kawngah hian China chuan WHO a pui zel dawn tih Xi chuan sawiin, ramdangah ventilator 2,09,000 an thawn chhuah tawh thu te, protective suit vaibelchhe 1.4 , hmaituamna vbc 151.5 an thawn chhuah tawh thu te chu a sawi bawk. Hei vang hian hri dona kawnga thawk hlawk ber leh thawk ṭha ber ram an nih thu Xi chuan a sawi a ni. 

Xi Jinping chuan China-in World Health Organisation (WHO) a thlawp ṭha hle niin a sawi a, a thawhpui zel dawn tih pawh a sawi bawk. Covid-19 hri dona kawngah Xi chuan an ram hmalakna chu a fak hle thu a sawi a, socialist ram an nihna avang leh Chinese culture avangin hri donaah hma an sawn phah hle thu a sawi bawk.

Thawhlehni khan Beijing-ah Covid-19 hnehna lawmna hun hman a ni a, he hunah hian Xi chuan mihring nunna chhanhim a nih theih nan China chuan engpawh tih a huam thu a sawi.