Israel-in rocket-a beihna a chhanglet

Israel chuan Gaza Strip aṭanga rocket hmanga an ram chhim lam beihna chu nimin khan chhang­letin, indo thlawhtheihna hmangin Gaza-a Hamas sipai training-na hmunte a kahsak.

Thawhlehni zan khan Gaza Strip aṭang hian rocket pali hmang­in Israel chhim lam bial chu kah a ni a, mahse thiltih chhiat a nei lo nia hriat a ni. Hemi chhanna atan hian nimin zing khan Israel sipaite chuan Gaza Strip chhim lama Rafah leh Khan Younis khuaah Palestinian helpawl, Hamas military wing training-na hmun ṭum li an kap zui ve leh nghal a ni.

Islamic Hamas movement leh Islamic Jihad (Holy War)-te chuan Israel rama rocket kaptute an nih loh thu an sawi a, Hamas senior leader Ismail Radwan chuan Gaza aṭanga rocket kahchhuah ani tih pawh hi an lo hre lo niin a sawi. An pawl chuan Gaza Strip-a inkahhai an puan chu an zawm thu a sawi.

Nikuma Gaza Strip-a Israel leh Hamas-te inbeihnaah khan Palestinian mi 2,200 leh Israel mi 73 in an thi a ni. Ni 50 zet an inbeih hnuah inkahhai thuthlung hi an siam a ni. Palestinian thi zinga a tam zawk hi civil mi a ni a, Israel lamah erawh a tam zawk hi sipai an ni.

Nimina Amnesty International in report a tihchhuahah, kum 2014-a Gaza buaina a thlen ṭum khan Hamas-te hian Palestinian mi 23-te an thah bakah mi dang tam tak nasa takin an nghaisa niin a sawi. Amnesty Middle East and North Africa director Philip Luther chuan, "Israel sipaite'n Gaza-a beihpui an thlak lai ngeiin, Palestinian hel, Hamas-te'n remchanga hmanga, anmahni mi leh sate ngei tam tak nghaisaa an tihlum hi thil vanduaithlak tak a ni," a ti.

Amnesty chuan Gaza-a Pales­tinian helpawlte'n rocket an kah vanga thi zingah Israel mi aiin Palestinian mi an tam zawk tih a sawi bawk. Mahse Hamas-te pawi khawihnaah hian mimal tumah mawhphurtua puh leh thubuai siamsak an awm loh avangin, heng pawikhawihna thlengte hi thuneitute hriatpuina emaw, an thupek emaw vanga ti nia a lan thu a tarlang bawk.