Madagascar Parliament-in President a ban

Madagascar Parliament chuan an ram President Hery Rajaonarimampianina chu nimin zing khan an ram danpui palzut leh a mawhphurhnate hlen lohah puhin President a nihna aṭangin ban a remti.

Parliament-a vote lakah, member 121 chuan President paihthlak an duh a, hetihlai hian member pali chauhin an hnial thung. Parliament-ah hian seat 151 a awm a, President paithla tur hian member awm zat aṭanga hmun thuma ṭhena hmun hnihin an thlawp a ngai a ni.

Member-te'n President paihthlak an remtihna hi High Constitutional Court-ah thawn a ni leh ang a, ani hian thutawp a lo siam ang.

Hetihlai hian parliament member zinga pakhat, Toto Marie Lydia chuan vote lak lai hian member 100 vel chauh an awm niin a sawi a, mahse official result chuan vote laknaah member 125 an awm tih a sawi thung.

Rajaonarimampianina hi kum 2014, January 25 khan President atan lakluh a ni. Khawvela ram rethei ber zinga mi, Madascargar mipuite tana an ram sum dinhmun siamṭhat a tiam a, mahse a thutiamte hi a hlen zo lo niin eptute chuan an sawi. Hei bakah hian high court dinna tur tikhawtlaiah puh a ni bawk.