Pope-in 1990 aṭangin TV a la en leh lo

Roman Catholic koh­hran hotu, Pope Francis chuan kum 1990 aṭang khan TV a en lo a, inter­net-ah a lut ngai lo bawk niin a sawi.

Argentina chanchin­bu, La Voz Del Pueblo-in a kawmnaah Pope chuan kum hnih kaltaa Pope atana thlan a nih hnuah a nun danglam dante a sawi. Khawvel puma member tluklehdingawn 1.2 nei, Catholic Kohhran hruaitu lu atana thlan ani chu amah ngei pawhin mak a tih thu a tarlang.

Francis chuan kum 2013, March thlaa Pope thar tur thlanna neihah khan thlan tlin a inrin loh em avangin Vatican-a a kal pawh kha a haw lehna tur thlawhtheihna ticket pawh a book sa vek tih a sawi.

Kum 78 mi, Pope hian Argentina-a nunphung mawlmang taka a awm laite kha a ngai fo ṭhin tih a sawi, Buenos Aires subway-te chu a ngai a, midangte nen inpawh leh innel taka awm reng a duh thu a sawi bawk.

Pope atana thlan tlin a nih hnuah Francis hian Vatican-ah zan lamah chhuakin, chenna in neilo khawlaia riak ṭhinte kawmin a ṭanpui ṭhin nia sawi a ni a, mahse hemi chungchanga report hi Vatican chuan a sawichiang duh lo.

Kum 1990 aṭang khan TV a en ngai tawh lo tih sawiin, zanah darkar ruk muin zing dar 4-a a thawh ṭhin thu a sawi a, nitin minute 10 aia tam Italy chanchinbu, La Repubblica chhiar nan a hun a hmang ṭhin bawk.

Tun hnaiah Islamic State (IS) firfiakte'n Vatican vauna tichhuak mah se, Pope chuan a hlau lo tih a sawi. "Pathian kutah ka awm a ni" a ti.