Kabul guest house beitu firfiakte an kaphlum

Afghanistan khawpui, Kabul-a ramdang palaite'n thlenna atana an hman fo ṭhin, Rabbani Guest house chu Thawhlehni zan khan firfiakte'n an bei a, pawikhawihtute hi Afghanistan sipaite'n bei letin nimin zing khan firfiak pali an kaphlum.

Taliban firfiak pawl chuan guest house beitu an nih thu hi nimin khan an puang nghal.

Afghan Interior Ministry chuan firfiakte hian rocket-propelled grenade launcher leh ralthuam dangte an nei niin a sawi, civil mi leh security force zingah thi an awm loh thu a sawi. Deputy Interior Minister Mohammed Ayub Salangi chuan firfiakte hi kahhlum an nih hnuah an ralthuam kawlte pawh laksak nghal an ni, a ti.

Firfiakte'n guest house an beih hi a hmain Heetal Hotel tih a ni ṭhin a, kum 2009 December thla khan car bomb hmanga beih a lo ni tawh bawk. Hemi ṭum hian mi pariat an thi a, midang 40 velin hliam an tuar.