Russia-in nihna thlak thleng phalna ramah Russian naupang an adopt khapna dan siam

Russia president Vladimir Putin chuan Inrinni liam ta, November 23, 2024 khan ram dang, nihna thlak thleng, gender transition phalna rama chengten Russia naupang an adopt khapna bill siam chu pawmin, law-ah a chantir.

He bill hi Russia Parliament in hnihten an lo pawm tawh a, President pawmpui tura thawn a nih hnuah, President Putin chuan a hming ziah hnanin, danah chantir a ni ta a ni.

Putin hian fa nei lo tur zawnga midangte fuihna lam tih chhuah, dan pawna hnawlna tur pawh a pawm bawk.

Khapna dan siam thar hian ram 15 chu a huam nghal dawn a, a tam zawk chu Europe ramte niin, anni bakah Australia, Argentina leh Canada pawh an tel. Kum 2012 khan US citizen-in Russia naupang an adopt chu an lo khap tawh bawk a ni.

Russia hian nikum khan an ramah nihna thlak thleng hi a lo khap tawh a, Supreme Court chuan LGBTQ+ “movement” chu firfiak/kalfawr tiin a lo puang tawh bawk. Kum 2022 khan Putin chuan mipui nawlpui hnena LGBTQ+ chungchang thehdarh khapna dan a lo siam tawh bawk. He hmalakna hi Russian Orthodox Churh chuan a thlawp a ni.

Russia Parliament, Kremlin member-ten he dan hi khawthlang ram anti-family ideology in an ram a chim ve tur laka venhimna a ni tiin, member ṭhenkhat phei chuan nihna thlakthleng chu 'satanic dik tak' tiin an sawi hial.

Vantlang zinga fa neih tam sawimawi lo leh, fa neih loh fakna zawnga thu thehdarhte pawh dan pawnah hnawl an ni thei tawh dawn bawk. Russia ramah hian nau piang an tlahniam nasa a, President Putin pawhin chhungkaw rual tak din a sawimawi a, nikum khan hmeichhiate chu fa pariatte nei turin a chah. Fa neih tlem leh fa neih loh sawimawina chu Russia mipui punna tih tlem a, an ram chakna tih nep sak tuma khawthlang ramte hmalakna pakhat niin an lo puh tawh bawk.