Philippines VP-in an ram President a vau

Philippines vice president Sara Duterte chuan an ram president Ferdinand Marcos Jr a vau vangin President venhimna tih khauh a ni.

Duterte hi President Marcos thawhpui ṭha tak a ni ṭhin a, Philippines rama politics lama thiltithei tak chhungkaw pahnih ami a ni. Tun hnaiah an chhungkaw inkar khi hi a zau zel a, Inrinni khan Sara Duterte chuan President hi na taka beiin, thah a nih chuan President Marcos pawh a thah tir ve dawn, tiin a Facebook page-ah a sawi.

Vice President Duterte chuan, "President nih dan tur pawh hre lo leh dawt sawi chingin min kaihhruai avangin kan ram hi hremhmunah a chang mek a ni," tiin President a beih avang hian a mimal himna chungchang erawh chu hlauthawng lo turin amah thlawptute a chah. 'Mi biak ka nei tawh a, a hnenah hian thah ka nih palh chuan President Marco, First Lady Liza Araneta leh Speaker Martin Romualdez te chu that ve nghal turin ka ti a ni," a ti. A mi chah pawh hian a remtih vek thu a sawi a ni.

Presidential communications office chuan Vice Preident Duterte thusawi hi an ngai thutak hle a, President Marcos a vauna ngeiah an ngai tih a sawi a, President venhimna pawh tih khauh nghal a nih thu an tarlang.

Sarah Duterte hi Philippines president hlui, Rodrigo Duterte fanu a ni. Rodrigo Duterte hi a President laia ruihhlo do beihpui a kalpui danah che rawva lutuka puh a ni a, International Criminal Court chuan a chhui mek a ni. Sarah Duterte hi June thla khan education secretary a nihna aṭangin a bang tawh a, mahse Marcos deputy-ah a la awm chhunzawm a ni. October thla khan President Marcos nena an inkar boruak a chhe hle tih sawiin, a chang chuan a lu tansakte ngaihtuah ṭhin niin a sawi. Marcos party thawhpui hnenah, amah chu an ṭhatna turin an hmang ṭangkai nia a hriat thu a sawi.