COP29 summit-ah climate funding atan USD tld 300 remti

Azerbaijan khawpui, Baku-a United Nations Climate Change Coference, COP29 neihah khawvel sik leh sa inthlak danglam zel do letna atan 2035-ah budget USD tld 300 siam an remti.

COP29 UN Climate Summit hi November 11-22, 2024 khan neih a ni a, summit khar niah hian ram rethei leh harsa zawk, sik leh sa inthlak danglamin a nghawngte puihna leh hma lakna turin, kum 2035-ah chuan kumtin USD tld 300 pek an remti a ni.

Hetih lai hian economist lam chuan sik leh sa inthlak danglam chak avanga harsatna tawk, ram ṭhang mekte puihna tur hian kum khatah USD trillion 1.3 vel a ngai niin an sawi thung.

Khawvel sik leh sa a danglam nasatna chhana mawphurtua puh, ram hausa zawkte chuan kum 2009 khan 2020-ah developing country-te tan kum khatah USD tld 100 pek nise tiin an lo rel tawh a ni. Mahse an intiamna hi kum 2022-ah an ti hlawhtling thei chauh thung.

Ram ṭhang mekte chuan USD tld 300 deal siam chu a tlem tham an ti hle thung. Sawiseltu zingah hian India pawh a tel. He fund hian sik leh sa vanga harsatna thlengte chinfelna tur atan a tawk lo hle niin a sawi.

Climate fund pek tura an ruahman atana sum thawh tur, ram hausa zingah hian US, Europe ram hrang hrang leh Canda te an tel. Hei hi kum 1992-a UN Climate talk neih behchhana siam a ni. Europe ramte chuan fund thawh tur hian China bakah Gulf ram hausa zualte telh an phut a ni. Ram ṭhang mekte pawh an theih anga thawh ve tura tih ni mah se, an tih ngei ngei tur erawh a ni lo thung.