Trump-a'n US military aṭangin transgender ban vek a tum

US president-elect, Donald Trump chuan US military aṭangin nihna thlak thleng, transgender-te ban vek a tum nia report a ni.

Official-te chuan US sipaia transgender awm mekte chu sipai ṭang zel turin an tlak lo tiin, 'medically discharge' vek tum an ni tih an sawi.

Kum 78 mi, Donald Trump hian a President term hmasaah pawh khan hetiang lam thupek hi a lo siam tawh a, transgender-te chu armed forces-a an luh a khap a, mahse sipaia lo ṭang sa tawhte erawh chu an ṭan chhunzawm a phalsak thung. Mahse he thupek hi President Joe Biden chuan a rawn sut a, US sipaiah transgender luh phalsak an ni leh ta a ni.

Trump hian thupek thar hi nakkum January 20-a US President atan lak luh a nih veleh tih chhuah nghal a tum nia sawi a ni. Thupek thar hi a hmaa a lo siam tawh aia khauh zawkin siam a tum a, transgender-te sipai an luh khap bakah, sipaia ṭang sate pawh ban vek a tum niin an tarlang. US military-ah hian transgender hi 15,000 vel an awm mek.

President-elect in a defence secretary atana a thlan, US military enkawltu tur Pete Hegseth pawh hi transgender chungchang ngaithei lo tak a ni. A hma pawhin sipaia transgendar lak luh chu US security tichhetu niin a lo sawi tawh.

Trump hi transgender chungchangah sector hrang hranga khuahkhirhna khauh tak siam duhtu a ni a, hei hi radical Democrats lamin an beihna nasa leh, a President an hlauhna chhan pakhat a ni. Trump leh Republican tam zawk hian 'girls' sports-a mipa telh duh lotu an ni, US-ah hian state 24-ah women's sports-ah mipa, hmeichhiaa an in nihna thlak thlengte telh khapna dan an hmang mek an ni.