Israel-Lebanon inkahhai puan a hnai; Netanyahu-a'n high-level meeting ko

Israel chuan Lebanon helpawl, Hezbollah nen inkahhai a puang dawn hnai nia sawi . US-in inkahhai puanna tura rawtna a siam chungchang ngaihtuahin Pathianni khan Israel prime minister Benjamin Netanyahu chuan high-level meeting a ko. A thuphung chuan US rawtna hi an pawm tawh a ni.

Kar liam ta khan inkahhai puan a nih theihna hma la tu, American palaite chuan Beirut leh Jerusalem an tlawh a, an rawtna siamte chu pawm turin an nawr a ni. He rawtna an siamah hina Hezbollah chu an ram hmarlam aṭanga inhnukdawkin, chhim lamah pawh Lebanon sipaite dah an ni bawk ang. Lebanon sipaite hian an ram chhim lama Hezbollah te indin ngheh tumna chu an dang tur a ni, tih a ni. Israel sipaite pawh Lebanon chhim lama an inbeihna hmun aṭanga inhnukdawk tura tih an ni bawk a ni. US hian inkahhai an puang thei a nih chuan, rawtna an siamte hi Hebzollah lamin an bawhchhia a nih chuan anmahni ngeiin hma an la zui dawn tiin Israel hi an tiam bawk.

Inkahhai puan a nih theihna tura inbiakna hi kalpui chhunzawm a nih mek laiin, Israel leh Hezbollah hi an la inbei zui reng a ni. Hezbollah chuan Israel chhim lama Ashdod naval base chu a vawi khatna atan an kap fuh niin an sawi a, hei bakah advanced missile leh strike drone hmangin Tel Aviv-a sipai hmun an bei tih an sawi bawk a ni. Israel sipaite hian an ram hmarlam beihna tura Lebanon aṭanga kah chhuah, proejct 250 chu an lo kap thla tih an sawi ve bawk. Lebaon aṭang hian missile 340 vel kah c hhuah niin Israel army radio chuan a sawi. Irael sipaite hian a hma nia Beirut khaw laili laia Hezbollah an beihnaah mi 29 thiin, mi dang 66 in hliam an tuar bawk a ni.

Israel sipaite beihpui thlakna avangin Lebanon-ah hian mi 3,500 chuang tawhin, hmun him lama tlanchhia hi mi mtd 1.2 vel aawm tawh niin Lebanon chuan a sawi. Israel pawhin Hebzollah helte an ram hmarlam an beihnaah an sipai 90 bakah civil mi 50 velin nunnan an chan tawh niin an sawi bawk. October 7, 2023 aṭang khan Israel hmar lam, Lebanon ramria cheng mi 60,000 chu hmun dangah an tlanchhe tawh bawk.