Moderna Inc-in Covid-19 vaccine hman phalna dil

Moderna Inc chuan Covid-19 vaccine an siam chu 94.1% in a rintlak thu an tarlan hnuah nimin khan hri kaite enkawlna atan emergency-a hman a nih theih nan hman phalna US-ah an dil.

Hemi chungchangah hian US Food and Drug Administration (FDA) chuan December 17-ah advisory committee neih a nih tur thu a tarlang a, hei bakah hian Pfizer Inc leh BioNTech SE siam vaccine chu 95% rintlak a nih thu an lo tarlan ve tawh avangin, FDA chuan emergency atana hman remtih a nih dawn leh dawn loh chu an ngaihtuah tel  dawn a ni.     

Europe-ah emergency atana hman phalna pawh European Medicines Agency hnenah phalna an dil dawn tih Moderna Inc chuan a sawi. Moderna chief medical officer Tal Zaks chuan an company-in Covid-19 vaccine an siam chu a rintlak a, an data chuan a rintlakzia a tihlan thu pawh a sawi bawk, khawvela hri leng mek hi an vaccine siam chuan a thlak danglam dawn niin a sawi.

Moderna Inc hian an vaccine siam hi mi 30,000-a enchhinna an neih aṭangin an hlawhtling hle tih an tarlang a, heng zinga mi 196 chu Covid-19 kai an nih thu tarlangin, mi 185 chu placebo hmanga enkawl niin a dang mi 11 hi vaccine hmanga enkawl an ni thung. Hri kai an enchhinna zingah hian hri kai pakhat a thih thu pawh an tarlang bawk. Kum tawp hma hian kum lama la nuapang zawkah an vaccine hi enchhinna neih leh an tum a, nakkum kumtir lamah kum 10 hnuai lamah pawh enchhinna neih leh an tum bawk a ni. An report-ah chuan an vaccine hian side effect a neih lo thu an tarlang tel.

Kumin chhungin  Moderna Inc chuan an vaccine siam dose maktaduai 20 chu US-a phurh thlen hman an rin thu a tarlang. Moderna leh Pfizer/BioNTech company chuan Covid-19 vaccine siam chhuah a nih theih nan kumin kumtir aṭang khan theihtawp chhuahin hna an thawk ṭan a, an vaccine siama technology an hman hi synthetic messenger RNA (mRNA) a ni. 

AstraZeneca leh vaccine siam chhuah tum company dangte pawhin synthetic messenger RNA (mRNA) hi an hmang ve bawk a ni. British-Swedish multinational pharmaceutical and biopharma­ceutical company, AstraZeneca chuan an vaccine siam chu 70% a rintlak thu an tarlang ve tawh bawk. 

Worldometers in a tarlan danin, nimin thleng khan khawvel ram hrang hrangah Covid-19 hri kai mi 6,36,41,374 an awm tawh. Hri kai zinga 4,40,28,943 chu enkawl dam ni tawhin, mi 14,74,984-in an thihpui tawh thung. Hri kai mek zinga 99.4% chu dinhmun ngaihtuahawm lo a ni a, mi 1,06,010 (0.6%) erawh an dinhmun a ṭha lo thung. 

US, India, Brazil, Russia, France, Spain, UK, Italy, Argentina leh Colom­bia-te chu hri kai hmuhchhuah tam zualna ram 10-te an ni.