US judge-in Trump 2020 election case a hnawl

US District judge Tanya Chutkan chuan President-elect, Donald Trump lakah 2020 inthlan result kaihhnawiha criminal case siamsak chu Thawhṭanni khan a hnawl.

Kum 2020-a US President inthlanna neihah khan Trump hi a chak zo lo a, mahse inthlan result puan hnuah a chak loh pawm lo a, thuneihna chan chhunzawm tuma puh leh, January 6, 2021-a US capitol-a amah thlawptuten buaina an siam chungchangah mawhphurtua puhin thubuai hi siamsak a ni. Mahse kumin inthlanah hneh taka thlan tlin a ni leh ta thung a, Justice Department policy-ah President ṭanglai lakah thubuai siamsak lo tur tih a nih vangin, Trump thubuai hi tihtawp a ni ta a ni. Trump thubuai chhuitu, special counsel Jack Smith chuan Trump election case hi hnawl tura a tih hnuah, a case hi hnawl a ni ta a ni.

Trump-a'n Mexico, Canada leh China te chhiah tih san a tum

Donald Trump chuan US President atana lakluh a nih veleh an rama dan loa pem lut leh, ruihhlo tawlh luh ṭhin venna tura hma lakna kawng khat atan Canada, Mexico leh China aṭanga bungrua lak luhah chhiah tih sanna tur thupek a ziah nghal tur thu a sawi.

President-elect chuan Mexico leh Canada aṭanga bungrua lak luhte chu chhiah 25% lak a ni dawn tih sawiin, China bungrua lak luhah pawh chhiah 10% lak belh a ni leh ang, a ti. China sorkarin US-a synthetic opioid fentanyl tawlh lutte dang tura hma a lak hma chu chhiah lak belhna hi hman a ni dawn tih a tarlang. Mexico leh Canada pawh an ramri kaltlanga US-a dan loa pem lut leh, ruihhlo tawlh luh ṭhinte an tih tawp hma chu chhia h hi tih san a ni dawn a ni, a ti.

Trump chuan, "Mexico leh Canada hian he thil chingfel tur hian thuneihna leh dikna an nei reng a, an man an pek a hun tawh a ni," a ti. China pawh fentanyl tawlhtute lakah thi tura hremna pek an lo intiam tawh zawm loah a puh bawk.