Pakistan-a Imran Khan thlawptute nawrh huaihawtah buaina chhuak

Pakistan-a Pakistan Tehreek-e-Insaf (PTI) party-in jail-a tang mek, an party hotu leh prime minister hlui, Imran Khan chhuah phuta nawrh an huaihawtah nimin khan buaina nasa tak a chhuak. Buaina chhuakah hian mi parukin nunna an chan tawh a ni.

Buaina chhuak vanga thi zingah hian security service mi leh sa pali an tel. Interior minister Mohsin Naqvi chuan nawrh huaihawtte hian ralthuam an hman chuan sipaite pawhin silai nen an chhang let ve nghal dawn tih a sawi.

Mipui pungkhawmte hnawh darh tumin police-te chuan tear gas te an hmang. Khan-a thlawptuten an beihna avangin journalist ṭhenkhat hliam tuar an awm bawk.

Imran Khan hi kum 2022-a Parliament-a no-confidence vote hmanga prime minister a nihna aṭanga paihthlak a nih hnuah thubuai tam tak siamsak niin, criminal case hi 150 chuang a nei a ni. Mahse an party chuan an puhna hrang hrang hi politics-a inbeihna a ni, an ti. A thubuai ṭhenkhatah hian thiam loh chantirin hremna pawh tih chuah a ni tawh a, nikum August thla aṭang khan jail-ah dah a ni.

Pakistan khawpui, Islamabad-a PTI nawrh huaihawt hi Imran Khan nupui, Bushra Bibi chuan a ho a, Khan hi chhuah a nih loh chuan hma an la chhunzawm zel dawn tih a sawi.

Nawrh huaihawt dawn vang hian Pakistan sorkar chuan kar liam ta Zirtawpni aṭang khan an ram chhung hmun ṭhenkhatah mobile leh internet service a ti tawpa, Khan-a thlawptu mi 4,000 chuang an lo man lawk tawh bawk.