Philippine President-in Vice President beih let a tum

Philippine president Ferdinand Marcos Jr. chuan a vice president Sara Duterte chuan mi thattu, assasin hmanga tih hlum tumin a phiarru nia sawiin, hetianga a beihna hi chhan let ngei a tum tih a sawi.

Philippine ram hruaitu pahnihte inkar boruak hi a ṭha lo hle a, vice president Dutete hian Inrinni liam ta khan online news conference a neihnaah, thah a nih hlauh chuan an ram president, a nupui leh House of Representative-a speaker te chu that ve nghal turin assasin a be fel tawh tih a sawi a ni.

Vice President thusawi vang hian President venhimna hi tih khauh nghal a ni a, justice department chuan vice president hi thu a sawi dan chungchangah thu zawhfiah tura koh a ni dawn tih an tarlang. National Security Council chuan Duterte thusawi hi an ram himna kaihhnawih thei thil a ni, an ti bawk.

Vice President hi a thusawi chungchang hi a hnuah sawi fel leh a tum a, a taka invauna ni loin, ama himna chungchang a ngaihtuah vang a ni, a ti. "President ka thah chhan tur hi a awm lo a, ka tan hlawkna engmah a awm lo," tiin a sawi ṭha leh. Mahse President Marcos chuan TV-a thu a sawiah, pawikhawih tumna hi an kaltlangtir dawnlo tih sawiin, a bei let dawn tih a sawi ve thung.