Israel PM-in Inthlan buatsaih duh lo

Israel prime minister Benjamin Netanyahu chuan eptu pawl lamin inthlan neih ṭhat an phut chu a thlawp lo tih sawiin, ṭangrual sorkar chu nghet taka din zel tura ṭan la turin a thawhpui party-te a sawm. 

Netanyahu chuan Likud party meeting-ah eptute chuan ṭul lo takin inthlan ṭhat buatsaih a nih leh theihna atan beih an tum tih a sawi a, mahse Likud party chuan hei hi a dodal dawn a ni, a ti. 

Eptu pawl, centrist Yesh Atid party hotu Yair Lapid chuan inthlan ṭhat buatsaih a nih theihna atan Parliament ṭhiat tura phutna bill chu putluh a tum thu a lo sawi tawh a ni. Bill a put luh tur hi Netanyahu-a'n ṭangrual sorkar a siampui mek, Blue and White party hnenah thlawp turin a ngen bawk. 

Blue and White party hotu Benny Gantz leh Netanyahu-te hian May thla aṭang khan ṭangrual sorkar an siam a, prime minister dinhmun inchelh chhawk turin an inrem a ni. Hetih lai hian sorkarin budget 2020 pawm mai loa a la tikhawtlai avangin Gantz hi a lungawi lo a ni. Gantz chuan budget hi pawm nghal a duh a, mahse Netanyahu chuan kum thar lama pawm tura tihkhawtlai a duh thung. 

Ram chhunga Covid-19 hri leng mek do letna kawnga a hma lak danah Netanyahu kaihhruai sorkar hian sawisel pawh a hlawh fo a ni. Jerusalem-a prime minister official residence bulah leh, khawpui hrang hrangah ṭum eng emaw zat mipuiten lungawi lohna lantira nawrh huaihawtin PM chu  bang turin an phut.