Pakistan-ah nawrh huaihawt zinga mi 1,000 dawn man tawh

Pakistan prime minister hlui, Imran Khan thlawptuten nawrh an huaihawt avanga buaina nasa tak chhuakah an zinga mi 1,000 dawn chu man an ni tawh tih thuneituten an sawi.

Imran Khan hi jail-ah a tang mek a, chhuah tura phutin amah thlawptute hian an ram khawpui, Islamabad-ah nawrh an huaihawt a ni. Police-te nen innawr buaiin, police-te chuan nawrh huaihawtte hnawh darhna atan hian tear gas te an hmang a ni.

Islamabad police hotu, Ali Rizvi chuan Imran Khan nupui, Bushra Bibi kaihhruaia nawrh huaihawtte hian security force lamin daidanna an siamte chu paltlang luiin, sorkar building leh embassy te awmna, Islambad khawpuia red zone chu luh luih an tum niin a sawi. Hei hi police-te chuan lo dangin, tear gas an hman bakah silai pawh van lam hawiin hmeh puah a ni tih a sawi. Buaina chhuakah nawrh huaihawt zinga mi paruk leh paramilitary force lam mi pali an thi a, hliam tuar tam tak an awm bawk.

Nawrh huaihawt vang hian prime minister Shebaz Sharif kaihhruai ṭangrual sorkar chuan Islambad khawpuia venhim hna thawk turin security force tam tham tak a tir a, mobile internet service pawh a ti tawp a ni.