Hamas-in Gaza-a inkahhai puan an inpeih

Israel leh Hezbollah ten inkahhai an puan hnuah, Palestinian firfiak pawl Hamas chuan Gaza Strip-a Israel nena inkahhai puan an inpeih thu an sawi ve leh.

Hamas senior official chuan Israel-Hezbollah te inkahhai puan chu ṭha an tih thu sawiin, Egypt, Qatar leh Turkey-a palai hna thawktute hnenah Hamas pawhin inkahhai puanga inremna siam chu a inpeih tih an hrilh niin a sawi. Hemi rual hian inremna siam thei loa tun thlenga an la awm chhanah Israel an puh tel bawk.

Hetih lai hian Israel lam chuan Hamas nena inremna siam chungchang hi sawi a la nei lo thung. Hezbollah nena inkahhai puan an pawm hnuah Israel prime minister Benjamin Netanyahu chuan, an sipate chu Gaza Strip lamah an insawrbing theih phah zawk dawn tiin a sawi a, Hamas nuaibo tur leh Israel an beih ṭuma an mi mante chhanchhuak tura an hmalakna chu hlawhtlinna an chan hma chawlhsan an tum loh thu pawh a sawi zui nghal a ni. Hei vang hian Gaza Strip-a inkahhai puang turin Hamas leh Israel lamin an pawm ve ve theih tur inremna hi an siam mai a la rinawm loh deuh a ni.