Indonesia-ah ruah a sur nasa; leimin vangin mi 27 thi tawh

Indonesia rama North Sumatra province-ah kar hmasa aṭanga ruah nasa tak a sur avangin hmun tam takah lei a min a, leimin vanga thi hi mi 27 an tling tawh niin nimin khan official-ten an sawi.

Disaster agency chuan North Sumatra province-a district paliah leimin leh tuilian an tuar tih sawiin, chin hriat lohin mi eng emaw zat an awm bawk a ni, a ti. Police leh sipaite chuan harsatna tawkte chhanchhuah hna hi an thawk mek a, mahse ruah a sur chhunzawm reng avangin hna an thawk chak thei lo a ni.

Chhiatna thleng hian in, mosque leh leilet te a ti chhe nasa hle a, thingtlang khaw eng emaw zat chu kal pawh theih lohin an awm bawk.

Mdean khua aṭanga Berastagi khaw pan tourist bus chu leiminin a hnawl a, he bus-a chuangte ruang chu lak chhuah an ni tawh. Kawng lakah hian leimin vanga motor tangkhang emaw zat a la awm mek niin National Search and Rescue Agency chuan a tarlang. Heng mite hruai chhuak tur hian ni hnih/thum hun an la mamawh dawn a, hmun tam takah thing a tluk bawk avangin chhanchhuah hna thawh hi an duh angin an kal chakpui thei lo tih North Sumatra Region Police-a traffic director Muji Ediyanto chuan a sawi.