Hamas-te'n Amnesty report an sawisel

Amnesty International-in Nilai­nia report a tihchhuahah, nikuma Gaza Strip-a Israel leh Palestinian pawl, Hamas-te an inbeih lai khan Hamas-te hian an Palestinian pui tam tak tihlumin an nghaisa bawk niin a tarlang. Hei hi Hamas chuan chhang letin, Amnesty report tihchhuah dan chu an dem thu an sawi.

Hamas Interior Ministry chuan, "Amnesty report hi Israel-in beihpui a thlak laia thil lo thleng palh eng emaw, ṭan lam hawi neia siam a ni," a ti a, report an siam dan chu a professional lo hle tiin a sawi.

Ministry thupuangtu Eyad al-Bazm chuan, Gaza Strip-a thil thlen dan dik tak chhui chiang duh an awm a nih chuan tualchhung mi emaw, international human rights organization pawh ni se, ṭha taka an thawhpui tur thu a sawi bawk.

Hamas palai, Mohamed Farj al-Ghul pawhin Amnesty report chu sawiselin, dik lo taka siam leh, Israel mite duhsak zawnga siam a ni, a ti. Report chuan a tuartu, Palestinian zawkte demin tualthattu ni zawk hialin a puh a, he report hi langtlang taka kalpui a ni lo a, a rintlak tawk lo a ni, a ti.

Gaza Strip-a mi tam tak thihna thleng chungchanga a mawhphurtu awmchhun chu Israel a ni tiin, Hamas chuan a sawi. Israel-te an thawhpui avanga Palestinian mi ṭhenkhat thi tura an chungthu relsak tawhte pawh, Israel-in Gaza a beihna avang hian an tanna hmun aṭangin an tlanchhuah theih phah tih an sawi bawk.

Hamas thuchhuah chuan Amnesty International chu dik lo taka an puhnate an tihchhuah hmaa awmze nei taka report siam dan chu kalpui turin a ti a, Palestinian mi an that nia an tarlan ṭhenkhatte chu Israel an thurualpui avanga anmahni chhungte ngeiin an thahte an ni, a ti.