EU-in a ramte hnenah raltlan la turin a ngen

European Union chuan member ramte hnena Syria leh Eritrea aṭanga raltlan, Italy leh Greece-a awm lailawk mek mi 40,000 te chu an rama luh phalsak turin a ngen.

Italy leh Greece-ah hian raltlan lut an tam em avangin an tan phurrit a tling tawh a, hei vang hian EU member ram dang 26-te hnenah an theih anga chhawk turin an ngen a ni.

Italy ramah hian raltlan mi 80,000 vel an awm mek a, an pun chak em avangin tualchhung mite pawhin an ngaithei lo ṭan nia sawi a ni. EY migration commissioner Dimitris Avramopoulos chuan himna zawnga an ram chhuahsana tlanchhia zinga mi 40,000 te chu EU member ram hrang hrangah kum hnih chhunga sawnchhuah an tum thu a sawi.

Member ramte'n refugee an lakluh theih zat tur hi an la sawi lo a, France chu Syria leh Eritrea refugee 6,753 lalut tura ngen a ni.