Middle East peace envoy Tony Blair-a'n banna a thehlut

Middle East remna palai hna thawk mek, Britain Prime Minister hlui Tony Blair chuan banna a thehlut a, June thla tawp aṭangin a hna a hi a chawlhsan ang. He hna hi kum riat a thawk hman a ni.

Tony Blair hian kum 2007-a Britain Prime Minister aṭanga a ban aṭangin he hna hi a thawk nghal a, Quartet tia sawi- United States, Russia, European Union leh UN aiawhin Israel leh Palestinian inkara inremna a awm theihna turin hma a la ṭhin.

Blair hian UN Secretary Gene­ral Ban Ki-moon hnenah a banna lehkha hi a thawn tawh a, a hna aṭang hian bang mah se Middle East-a remna leh muanna a awm theihna tura theihtawpa thawhpui zel a tum thu a sawi.

Quartet chuan kum riat chhunga Blair-a hna thawhte avanga an lawm thu sawiin, Israel-Palestinian inkara inremna a awm theihna tura a inpekna te, West Bank leh Gaza-a mipuite nunphung chawikang tur leh, an economy dinhmun siamṭha tura a beihna zawng zawngte avangin an lawm hle tih an sawi. Tony Blair thlaktu tur hi ruat a nih dawn leh dawn loh sawichian a la ni lo.

Blair hian Quartet aiawha remna palai hna a thawh chhungin hlawhtlinna lian tham sawi tur a nei hran lo a, Israel lam duhsakna lantir nasa leh, Palestinian-te tana bei nasa tawk lohate puh a ni. Mahse a hnathawhna kawngah hlawhchhama sawi theih erawh a ni lo. Palai hna chu remna leh muanna a awm theihna tura hmalak bakah, Palestinian biala hmasawnna a thlen theihna tura beih a ni. Blair hian Quartet palai hna a thawh chhung hian Palestinian bialah hian chetvelna kawngah zalenna zau zawk a thleng a, hei bakah hian moble phone service pawh pek a ni bawk.