Myanmar-in foreign loan puk a remti

Myanmar Parliament chuan an rama thingtlang bialte tihhmasawnna turin South Korea aṭanga loan, US dollar maktaduai 137.88 puk a remti.

Loan hi South Korea-a Economic Development Cooperation Fund (EDCF) hnen aṭangin Ministry of Construction chuan a puk dawn a, Yangon leh Ayeyawaddy biala thingtlang tihhmasawnna atan hman a ni ang.

EDCF hian Taunggyi-Mandalay, Mandalay-Myitgyina, Dawei-Kawthoung leh Magway-Sittway inkara fiber link tihlenna atan dollar maktaduai 55.874 loan a pe dawn bawk a, hemi atana inremna hi Myanmar Ministry of Communications and Information Technology leh Export-Import Bank of Korea-te chuan an ziak tawh a ni.

South Korea hian hun eng emaw chen chu Myanmar rama agriculture, irrigation technology, rural and socio-economic development leh health sector tihhmasawnna turin Myanmar sorkar hi a lo pui fo tawh a ni.

Parliament chuan Japan International Cooperation Agency hnen aṭanga dollar maktaduai 21 puk a remti bawk a, he sum hi Ministry of Electric Power leh Ministry of Transport-te'n Yangon-a power distribution project siamna atan an hmang ang.