IS firfiakte'n Palmyra-a monument an tichhia

Islamic State (IS) firfiakte chuan Syria-a hmanlai thil hlui awmna khawpui, Palmyra an lak hnuah khawpuia milim leh thil hlui hlu tak takte chu tihchhiat loh an tiam chungin, kum 1,900 zeta upa, Lion of Al-Lat lim chu an tihchhia.

Kar hmasa Ningania Palmyra khawpui an lak khan, IS hian tualchhung mite hnena an khawpuia hmanlai thil hlute chu humhalh sak an tiam a, hei vang hian tualchhung mi tam tak pawhin an thlawp phah a ni. Mahse firfiakte hian an thutiam hi hlen loin, thil hlute an tichhe ṭan a, building pawimawhte pawh an khawih tel.

Firfiakte'n thil hlu an tihchhiat zinga mi, Lion of Al-Lat lim hi kum 1,900 zeta upa a ni tawh a, khawpui chhunga lar tak, Temple of Bel pawn lama dah a ni. He milim hi Arab pathiannu, Al-Lat puala siam a ni. Temple of Bel hi kum AD 32 hunlaia sak a ni. IS-te'n Palmyara khawpui an lak hnu hian temple leh a chhehvel hi an pawl sipaite awmna hmun atan an hmang zui a ni.

IS firfiakte hian Syria rama hmun tam tak chu an thununna hnuaiah an dah tawh a, hetihlai hian al-qaida nena inzawmna nei Nusra Front leh a thurualpui helpawl dangte chuan Turkey ramri bul, Idlib province-a Ariha khua chu Syria sipaite kut aṭangin an la ve leh bawk.

Helpawl inzawmkhawmte hian Amry of Conquest tih an invuah a, sipaite nen nasa taka an inbeih hnuah Ariha khua hi lain, checkpoint-te pawh an kutah a awm tawh tih an sawi. State TV-a sipai thuchhuah pawhin Ariha khawchhungah helho hi an lut tih an tarlang.

Syria sorkar chuan Turkey ramri aṭangin an ram chhungah hel tam tak an lut tih a sawi a, helte hian US siam TOW missile pawh tam tak an nei nia sawi a ni bawk.