Israel-in inkahhai puan bawhchhiaah Hezbollah puh

Israel sipaite chuan Lebanon helpawl, Hezbollah nena inkahhai an puan hnuah, an inremna siam chu helpawl hian an bawhchhia niin a puh a, hei vang hian Lebanon chhim lama Hezbollah hmun chu a kap ve leh nghal.

Hezbollah hian inkahhai puan hnuah Lebanon chhim lamah rocket an dahna hmunah hma an lak chhunzawm zel tih Israel lam hian an hmu chhuak a, hei vang hian inkahhai puan ni hnihna, Ningani khan indo thlawhtheihna hmangin he hmun hi an bei ve nghal a ni. Israel beihpui thlakna avang hian thi leh hliam an awm leh awm loh erawh sawi lan a la ni lo. Inremna an siam bawhchhiat a nih chuan hma an la zui ve nghal dawn tih an sawi bawk.

Thla 14 zet an inkah hnuah Israel leh Hezbollah hian Thawhlehni zan khan US leh France rawtna anga inkahhai puang tura inremna hi an siam a, Nilaini aṭangin hman zui nghal a ni.

Inremna an siamah hian Lebanon chhim lam aṭangin Hezbollah te chu insaseng a, an aiah Lebanon sipaite dah tura tih an ni a, Israel sipaite pawh ni 60 chhungin a tahtawla inhnukdawk tura tih an ni bawk. Hetih lai hian Lebanon chhim lamah Hezbollah mi lah sa eng emaw zat chu motor hmangin an thlen belh niin Israel sipai thuchhuah chuan a tarlang.