Russia-in EU official thenkhat a rama luh a khap
Russia Foreign Ministry chuan European Union (EU) in an ram hrekna a siam avanga lungawi lohna lantirna atan, EU mi leh sa ṭhenkhat chu an rama luh a khap.
Russia-in an rama luh a khap list hi Inrinni khan a tichhuak a, an zingah hian politician, diplomats leh military expert-te an tel. List hi EU member state tinte embassy-ah thawn a ni.
Media report chuan list-ah hian EU citizen 89 hming tarlan a ni a, an zingah hian Polish mi 18 an tel tih an sawi.
Tun hnaiah EU politician eng emaw zat chu Russia rama an luh khapsak a ni a, hemi chungchangah hian EU chuan Russia thuneitute chu hetiang a thiltih chhan hi sawifiah turin a phut tawh a ni. Hemi hnu hian EU Foreign Affairs hotu, Federica Mogherini chuan Russia-in blacklist a siam thu hi a sawi a, "He thil a siam dan hi langtlanga kalpui a ni a, Russia hian a mimal duhdan a kalpui mai a ni," a ti.
Russia ṭhenawm, Urkraine-a inlakhran duhtu pawl helte'n Ukraine sorkar an beihnaah, Russia chuan helho hi puiin, Ukraine tualchhung buainaah a inhnamhnawih nia puh a ni. Hei vang hian khawthlang ramte chuan Russia mi pawimawh ṭhenkhat chu hrekin, an rama an luh an lo khap tawh a, an thil neihte khawih chet theih lohin an dahsak bawk. Mahse Russia chuan Ukraine helte puia an puhna hi a pha thung.
Inrinnia Russia blacklist siamah hian EU Council general secretary Uwe Corsepius leh British deputy prime minister Nick Clegg-te pawh an tel a, anni bakah hian British intelligence leh military hotute, MI5 director general Andrew Parker, MI6 hotu hlui Sir John Sawers leh chief of the defence staff General Sir Nicholas Houghton te pawh an tel. List-a telh zinga tam tak hi Russia parliament, Kremlin rorelna sawiseltute an ni.