WHO-in meizuk khap vangin Beijing chawimawina hlan

Nimina World No Tobacco Day den­chhenin, Beijing-in khawpui chhunga mei zuk khapna dan a siam thar avangin World Health Organization (WHO) chuan WHO World No Tobacco Day Award a hlan.

Beijing Municipal Government-in meizuk khapna dan a siam tharah hian, khawpui chhunga indoor public place, hnathawhna hmun leh public transportation-ah reng reng mei zuk a khap tawh dawn a, he dan thar hi vawiin aṭanga hman ṭan a ni ang.

WHO Regional Director, Shin Young-soo chuan, "Beijing-in a mi te hriselna ngai pawimawha mipui vantlang punkhawmna hmuna mei zuk khapna dan a siam hi lawmawm kan ti hle a ni.

Khapna dan thar hnuaiah hian vawiin aṭang hian Beijing airport terminal pathuma smoking room te chu khar a ni ang a, airport pawn lamah meizukna hmun 11 siam a ni thung. Vantlang hmun pawimawha in chhunga mei zute chu hek theih reng an ni.

Khawvela vaihlo siamtu lian ber leh hmangtu tam ber ram, China-ah hian meizu mi maktaduai 30 vel an awm a, kumtinin second-hand smoke tuartu maktaduai 740 vel an awm bawk.

Official data-a tarlan danin, kum tin China ramah hian meizuk leh a kaihhnawihna natna avanga thi mi maktaduai khat chuang an awm ziah a ni.