Nigeria khawpuia thihchilh bomb puakah mi 30 an thi

Nigeria rama Maiduguri khuaah Inrinni khan thihchilh bomb tihpuah a ni a, mi 30 vel an thi.

Bomb tipuaktu hi bazar bula Mosque chhungah lutin, a bomb pai hi a tipuak ta nia sawi a ni. Bomb puah lai hian mosque-ah ṭawngṭai mi eng emaw zat an awm a, pawn lam bazar-a thil zuarte pawh thi zingah hian an tel.

Borno state Governor Kashm Shettima chuan pawikhawihna hmun hi a tlawh a, mosque bangte hi a chhe nasa hle.

Bomb tipuaktu hi eng pawl nge a ni tih hriat ni lo mah se, Boko Haram helpawl mi nia rin a ni. He pawikhawihna hi Nigeria President thar atana Muhammadu Buhari lakluh a nih hnu lawka thleng a ni a, President thar hian hian an rama helho chu nuai chimih vek a tiam a ni.

Boko Haram hian Nigeria ramah Islamic ram din a, Islam Shariah law hmang tumin kum ruk zel sorkar lakah a hel tawh a ni. Hemi chhung hian an pawikhawihna vangin mi sang tel an thi tawh a, mi maktaduai khat chuang zet chu in leh lo nei loin an awm phah bawk.