Syria helpawlin Aleppo khawpui an la
Syria helpawl, Islamist Hayat Tahrir al-Sham (HTS) chuan nimin, Pathianni zing khan an ram hmarthlang lama khawpui, Aleppo chu Syria sipaite kut aṭangin an la.
Helpawl hi kum eng emaw chen an reh hnuah kar liam ta tir lam khan beihpui an rawn thlak thar leh a, Inrinni khan Aleppo huam chhungah sipaite nen nasa taka inbeiin, sipai eng emaw zat an thi. Hemi hnu hian sipaite hi Aleppo aṭang hian inhnukdawkin helpawl hian an la zui ta a ni. Helte hian Aleppo khawpuiah hian nimin tlai dar 5 thleng khan curfew an puang zui a, hei hi mipuite himna atana ti niin an insawi.
Aleppo khuaa inbeihna thlengah hian mi 327 an thi a, thi zingah civil mi 44 an tel niin Syrian Observatory for Human Rights chuan a tarlang.
HTS hi Nusra Front tia hriat ṭhin an ni a; US, Russia, Turkey leh ram dang eng emaw zatin firfiak pawlah an puang tawh a ni. Kum 2011-a Al Qaeda hnuaiah Jabhat al-Nusra tia din niin, a dintu zingah hian Islamic State (IS) group self-styled leader, Abu Bakral-Baghdadi pawh a tel. Mahse kum 2016 khan an pawl hruaitu, Abu Mohammed al-Jawlani, chuan Al-Qaida nena an inzawmna chhu chatin, Jabhat al-Nusra tih chu aṭhiat a, a hnuah helpawl dangte nen inchhunfinin an pawl hmingah Hayat Tahrir al-Sham tih hi an hmang ta a ni.
Syria ram ṭhianṭha, Russia chuan Syria president Bashar al-Assad kaihhruai sorkar leh sipaite thlawpna lantirin helho lakah hian beihpui an thlak ve nghal niin an sawi.
US pawhin Syria ram dinhmun hi uluk takin a thlithlai reng tih White House National Security Council chuan a sawi. NSC thupuangtu, Sean Savett chuan Syria sorkarin an rama remna leh muanna a awm theihna tura inbiakna neih a duh lo tlat leh, Russia leh Iran laka an innghah tlat chu a rah chhuak a lang ta niin a sawi. Hemi rual hian helho chet danah US chuan inrawlhna engmah a nei lo tih a sawi nghal a, buaina tih reh a, inkahhai puang turin a nawr.
Kum 2011 aṭang khan Syria-ah hian tualchhung indona hi a thleng tawh a, mi sang tel an thih tawh bakah, mi maktaduai tel chu hmun him lamah an tlanchhe tawh bawk. Iran leh Russia puihnaa President Assad-a kaihhruai sorkarin an ram hmun tam zawk leh khawpui liante a thunun hnuah tualchhung indona thleng tam zawk chu kum eng emaw chen a ziaawm ta a ni. Mahse hun rei tak hnuah HTS hi rawn che chhuak lehin, Aleppo khawpui an rawn la ta a ni.
Helpawl hian Aleppo khua an lak hnuah a bulhnai province-te chu lak tumin an pan chhunzawm leh nghal nia sawi a ni. Mahse, president Bashar chuan helte hi beih let an ni dawn a, an hneh leh ngei dawn tih a sawi.