Britain PM-in Punkhawm khapna thar a tichhuak

Britain prime minister Boris Johnson chuan an ramah Covid-19 hri kai thar an pun leh tak avangin Nilaini khan punkhawm khapna, khuahkhirhna thar a puang leh.  

Khapna siam tharah hian mi paruk aia tam punkhawm khap a ni a, midang hlata awm, social distancing dan pawh khauh taka kenkawh tura tih a ni. Hei hi September 14 aṭanga hman ṭan a ni ang.  He dan zawm lo hi hrem emaw pawisa chawi tir emaw theih an ni dawn. Khuahkhirhna dan an hman mekah chuan mi 30 chin punkhawm phal a ni. 

September 5 khan Britain-ah hri kai hmuh chhuah thar mi 2,988 an awm leh a, hei hi May 23 hnua ni khata Britain-a hri kai hmuh chhuah tam ber ni a ni. Hemi hnu hian hri kai hi an pung chho leh ṭan a ni. Hei vang hian PM Johnson chuan hri darh zel tur venna atana khuahkhirhna thar siam hi a puang leh ta a ni. 

Johnson chuan he khapna ṭhar hi damdawi lam mithiamte thurawn anga siam a nih thu sawiin, "Hetianga hma lak hi ṭul tawh lo se ka ti hle. Mahse in prime minister ka nih angin, hri darh tur venna leh nunna chhanhim a nih theihna turin a ṭul anga kan chet zel a ngai a ni," a ti. Khuahkhirhna siam thar chu police leh agency dangten khauh taka an kenkawh tur thu a sawi bawk. He dan thar siam hi ram puma lockdown ṭum hnihna puan a ngaih lohna tura ti an nih thu a sawi. 

Britain-ah hian August thla aṭang khan nitin hri kai thar 1000 vel awm ziah anga chhut a ni. Hri kai thar zinga a tam zawk hi kum lama naupang zawk an ni. 

US-a Florida state chuan August thla aṭang khan school a hawng leh ṭan a, mahse school hawn a nih hnuah naupang zinga hri kai zat hi 34%  in a pung. 

Florida Department of Health data tihchhuahah, August thlaa school hawn a nih aṭang khan naupang, kum 18 hnuai lam zingah hri kai thar 10,513 an awm tawh a ni. Hei vang hian school leh classroom eng emaw zat chu khar lailawk an ni leh. 

Hetih lai hian state sorkar chuan hmun ṭhenkhatah health data hi puangzar lo tura a tih avangin  khawi school-ah nge hri a darh hriat hleih theih lohte pawh a awm a, hei bakah hian district tinte chu zirlai leh zirtirtuten hmai tuamna, mask an hman leh hman loh chungchangah thuneihna a pe bawk. 

School ṭhenkhat chuan hman ngei tur an tih laiin, hman ngai lo tihna pawh eng emaw zat a awm niin report chuan a tarlang bawk. 

Khawvela hripui leng mek, Covid-19 kai chu nimin thleng khan mi 2,80,52,222 an awm tawh niin worldometers chuan a tarlang. 

Hri kai hmuh chhuah tawh zinga 9,08,475 in an thihpui tawh a, hetih lai hian enkawl dam 2,01,20,395 an awm tawh thung. Hri kai mek zingah 99% chu harsatna nei lo an nih laiin, 1% (mi 60,551) chu dinhmun ṭha lo leh ngaihtuahawm an ni thung.

 

US chu khawvela hri kai tamna leh thihpui tamna ber ram a la ni chhunzawm zel. Hri kai hmuh tawh hi 65,49,771 awmin an zinga 1,95,245 in an thihpui tawh. India chu hri kai tam ram pahnihna niin Brazil, Russia, Peru, Colombia, Mexico, South Africa, Spain leh Argentina ramte chu Covid-19 kai hmuh chhuah tamna ram 10 zingah an tel a ni.