US President Joe Biden-a'n a fapa a ngaidam

US president Joe Biden chuan Pathianni, December 1, 2024 khan a fapa, Hunter Biden chu thubuai pahniha thiam loh chantir a nihnaah a ngaidam.

Kum 54 mi, Hunter Biden hi chhiah awlru leh silai kawl kaihhnawihah thubuai siamsakin, thiam loh chantir a lo ni tawh a ni. President ṭanglai fapa zingah thil dik lo tia puha thiam loh chantir hmasa ber a ni. He a thubuaiah hian hremna tur tih chhuah a la ni lo a, jail tang ngei tura rin a nih laiin, a pa chuan a presidential power hmangin a ngaidam ta a ni.

President Biden hian a hmain Justice Department thutlukna siamah inrawlh a tum loh thu leh, a fapa ngaihdamna tura a power hman a tum loh thu a lo sawi tawh a ni. Mahse a thusawi hi sutin, a President term tawp dawn hnaiah a ngaidam ta a, hei hi America mipuite pawhin an hriatthiam a rin thu a sawi.

Hunter Biden hian chhiah awlrua puhnaah hian kum 17 thleng lung-in tantir theih a ni a, hei bakah silai kawl kaihhnawiha thubuaiah hian kum 25 thleng tan tir theih a ni bawk. Heng thubuaia hremna hi December 12 leh 16-ah puan chhuah tura tih a ni a, mahse hemi hma hian President ngaihdamna a chang ta a ni.

Biden hi US President zingah a thuneihna hmanga mahni chhungte ngaidam hmasa ber a ni lo thung. Kum 2001 khan Bill Clinton chuan a unaupa, ruihhlo kaihhnawih thila thiam loh chantir, Roger Clinton chu a lo ngaidam tawh bawk. Kum 2020-ah Donald Trump pawhin a fanu,Ivanka pasal pa, Charles Kushner pawh a lo ngaidam tawh bawk. Trump hian a kaihhruai sorkar tharah Kushner hi France-a US ambassador thar atan a thlan thu a puang tawh bawk.