Palestinian FM-in Arab ramte Israel-UAE deal pawm lo turin ngen
Palestinian foreign minister Riyad Al-Malki chuan Nilainia Arab League meeting-ah Arab ramte chu tun hnaia United Arab Emirates (UAE) leh Israel ramten inzawmna an siam chu pawm lo turin a ngen.
Riyal Al-Malki chuan UAE leh Israel-in inzawmna siamṭhata inremna siam an remtih tawh, kar lehah ziahfel an tum chu na taka sawiselin, lirnghing ang maia chhiatna thlentu tur niin a sawi.
Arab ram tam zawk chuan kum 1967-a Israel-in Palestinian ram a lo luahsak tawh chungchanga inremna siam a nih phawt loh chuan, Israel nena inzawmna siam an duh lo a ni. Palestinian chuan US hmalaknaa Israel-UAE deal siam chu na takin an sawisel fo a, Palestinian ram din a nihna tur hmalakna tihkhaihlak theihah an ngaih thu an sawi. Al-Malki chuan US chu Israel inremna siampui tura Arab ram dangte nawrah a puh bawk.
Video conference hmanga Arab League meeting neihah hian deputy secretary general Hossam Zaki chuan Palestinian lam hian pawm lo turin ngen mah se, darkar thum chhung an sawiho hnuah Israel-UAE demna resolution an siam thei lo tih a sawi.
Resolution siam tur chuan hun an la mamawh a, mahse an siam theih ngei a beisei tih a sawi a ni.
Arab League secretary general Ahmed Abul Gheit chuan resolution hi siam thei lo mah se, Aram ramten an duh ber chu Israel-in Palestinian ram a luah chu a chhuahsan a, East Jerusalem khawpui atana hmanga Palestinian ram din chu a ni, a ti. Hemi rual hian eng ram pawhin a ṭha an tih anga foreign policy siam turin dikna an nei a ni, a ti bawk.