Iraq leh Afghanistan-a US Sipai lakchhuah tum
US Central Command-a Commander, Kenneth McKenzie chuan Nilaini khan Iraq leh Afghanistan-a an ram sipai awm mek zinga eng emaw zat chu lak chhuah an ni leh dawn tih a sawi.
Nilaini khan Operation Inherent Resolve ceremony neih a ni a, he hunah hian McKenzie chuan tun thla chhung hian an ram sipai 3,000 chu Iraq aṭanga lakchhuah an tum thu a sawi. US sipaite lakchhuah belh an nih chhan hi Iraq nena an inkungkaihna a ṭhat chhoh tawh avang leh Iraqi force-ten hma an sawn chhoh zel vang a ni, tiin McKenzie chuan a sawi bawk.
Iraq-ah hian US sipai 5,000 chuang an la awm mek a, heng sipai te hian Islamic State (IS) firfiak beihna kawngah Iraqi sipaite an pui ṭhin a ni. A bik takin US sipai te hian Iraq sipaite hi thurawn an pek ṭhin bakah training an neih pui deuh ber ṭhin.
McKenzie chuan Afghanistan-a US sipai awm mek zinga 4,500 vel chu November thlaah lakchhuah tum a nih thu a sawi bawk. Hei hi Taliban firfiak nena kumin February thlaa inremna an lo siam tawh bawhzuina a ni.
Inremna an ziahah khan US sipai te hi nakkum May thlaah chuan Afghanistan aṭanga lakchhuah vek tura tih an ni a, mahse Taliban lam hian firfiaka chetna an thlen leh emaw, firfiak dang an thawhpui emaw a nih chuan US chuan a duh angin a che zui dawn tih a sawi.